Nasihat keu Mahasiswa Baro

Coretan Tangan Mustafa Ibrahim Delima, SE

Assalamualaikum rahmatullah
Peuleumak kuah ngon aneuk kadra
Meu krue seumangat adoe meutuah
Katroh ta langkah keunoe u banda

Dari gampong jioh sileumpah
Keunoe ta langkah u kuta raja
U bak IAIN dengon Unsyiah
Tajak kuliah sambong sikula

Oh ka troh keunoe bacut lon peugah
Gata ka jeulah jeut Mahasiswa
Jeut keu mahasiswa leupah that sosah
Gata beutabah beurayeuk saba

Seunggoh meureunoe ngon peugot tugah
Adoe meutuah ngat got I P K
Beutatem deungon peu Dosen Peugah
Beujeumot langkah u bak pustaka

Bek gata adoe peugot masalah
Sayang that ayah seureuta poma
Hek that mita peng ngon reuoh reuah
Cari nafakah kirem keugata

Geujak u lampoh geu dereh geutah
Na nyang tueng upah bak ureung kaya
Geu ceumatok dalam blang luwah
U laot leupah kawe jeunara

Bah that tan keudroe han jeut masalah
Keu Aneuk meutuah teutap geupeuna
Beuna ta ingat pengorbanan ayah
Sabee lam sosah pike keugata

Reu oh nyang ka rhoe bek le ta tamah
Bek sampe nang yah geu rho ie mata
Saweub digata han lheuh kuliah
Reuoh nyang tumpah nyan sia-sia